من الذاكره .. عندما كنت متعفطُ تحت الدركسون

في ذاك اليوم قبيل 9 سنوات تقريباً كان الأهل مسافرين خارج الرياض فقد كنت لحالي بالبيت ( عزوبي) في ذاك الوقت كانت سيارتي ددسن غماره ( كني بدوي ) وكنت مولع ..

بطلعات البر والكشتات حتى الثماله ، حتى أني ما تهمني المسافة اللي أقطعها للوصول إلى مكان الكشتة .. تعرفون الرياض أقرب مكان يصلح للكشتة يبيلك تقطع مسافة 65كيلو .. المهم في ذاك اليوم قلت خلني أدق على حدى هالشباب وأطلع معه نتعشى بالبر وأغير جوا من غثا الشغل الصيفي ومن غثا الرياض وزحماته .. كنت فكرت من قبل مع من أطلع ووقع الاختيار على شخص من أعز الأصدقاء .. دقيت عليه ومن حظي انه كان يمر بنفس الظروف الصعبة اللي أمرفيها ( العزوبية ) .. لا وقال إن عنده واحد من أخوياه من بريده وجايه زيارة وانه بيطلع معنا ، فقلت تمام كلما كثر افراد العصابه زانت الطلعه .. خويي هذا سيارته هايلكس لكن كحيانه ومهتريه ( شكلي أبنجلد إن كانه قرى هالشخاميط ) .. الزبده : إننا أتفقنا على الموعد والعفش .. وبالفعل ألتقينا عند مدخل النفود .. وبعد السلام وهه وهه وين نجلس ، وين تبون ، أسبقنا أنت ، لا أنتم .. عاد أنا زي ما قلت لكم من قبل ماخذ بنفسي وبسيارتي مقلب ، فعلى طول دخلت النفود قبله وهو صار يمشي وراي .. قطعنا مسافه وحنا على هالحاله إلين وصلنا لذاك الطعس ( طعس : تطلق على الشيء المرتفع من النفود وتطلق أيضاً على البدوي ) ، وقفت أنتظر خويي إلين وصل قلت له أطلعه قبلي فرفض وأنا ماصدقت خبر .. سبقته ومشيت بأقصى سرعه خوف من أني أغرز ثم أتفشل منه هو وخويه .. وأنا في لحظات الصعود طاير ومتحمس ومنسجم مع حنة المكينة كأنه بدى للطعس طرف حاد وأثر هذا اللي أنا قاعد أرقاه سيف ( السيف : يطلق على الأداة الحاده ، ويطلق على المكان المرتفع من النفود إذا كان ذو قمة حادة ممتده ) .. عاد وش رايكم جاي مقلع على وجهي وراقي سيف ، وش بيصير أكيد النتيجه أبنط ( أبقفز ، أبنط ) وهذا اللي صار نقزت حوالي 3 أمتار .. ما دريت بنفسي إلا وانا متعفط تحت الدركسون ، والغبار يملئ الكون ، وربعي يدورون ، أين سائق الدادسون ( هههـ قلبتها سجع ) على بال ما اخذت أنفاسي وتنفسة الصعداء ، وشفطت من الهواء حتى امتلت رئتاي من الكربون الخارج من السياره نتيجة النطه.. نزلت من السيارة وما أخذت شوي إلا والشباب جايين مسرعين زيي لكن تداركوا الموقف ووقفوا بنص السيف ولا كان طبوا بحوض الددسن .. وجهي صار طماطه من الفشيلة والإحراج .. نزلوا الربع وهم فاطسين من الضحك علي وأبو الشباب خويي الله يجزاه خير مسكها تطنز علي بغيت أبطل من الطلعة ، على العموم حنا كمل طلعتنا عقب ما طلعنا مواترنا وزبطنا العشاء وسمرنا سمره حلوه ثم رجعوا ورجعت أشعث أغبر ..

سردت لكم هذا الموقف من الذاكرة دون أي تبهير ، وصورته لكم كما أنكم معنا ..