أكلات برية (1)–> كبسة السمان المشوي

15 10 2008

أهلا وسهلا بكم احبتي  ..

أعتذر لكم عن التأخر في تنزيل العدد الأول من الأكلات البرية .. تعرفون إذا عاد الواحد من بعد الإجازة يكون محتاس وغير مترتب لكن الحمدلله مشت الأمور على ما يرام ..

أولى طبخاتنا في هذا القسم كما هو واضح بالعنوان هي كبسة السمان المشوي..

اعددنا عدة الكشته ( الطلعه ) ولوازم الطبخ اللازمة وقمنا بشراء السمان .. وكان عدد افراد الرحله 11 شخصاً لذا كان لزاماً علي توفير 44 حبة سمان بحيث يكون نصيب كل واحد منهم 4 حبات نظراً لصغر حجمها كما سترون بالصور اللاحقة ..

وش رايكم نقهويكم ولا نبدا بالطبخه :) (من شاور ما عطى )

لا شكلكم مستعجلين تبون تشوفون خربطتي وبربستي  .

بسم نبدأ .. انطلقنا الساعه 9 بعد صلاة العشاء متوجهين للنفود .

وصلنا الى المكان .. مشاء الله الأجواء جميلة وتميل للبروده لأن الجو بدأ بالتحسن نظراً لقرب دخول الوسم ( الوسمي )

بعض الشباب ذهب لجمع الحطب الكافي لشواء الفري (السمان ) وللتفكه بفاكاهة الشتاء حتى وان لم يكن الجو بارداً جداً ..

أشعلت النار وأعدت القهوة ..

وهرعت أنا بإعداد وجبة العشاء ..

المقادير :)

قدر كاتم + بصلتين + طماطتين + زيت دوار الشمس + ربع كيلو حبحر ( فلفل ) + 44 سمانه + ما يكفي لـ 11 شخص من الأرز + لومي ( ليمون أسود ) + دارسين ( قرفه ) + زبيب ومكسرات

في البدء وضعة قليلاً من الزيت في القدر ثم وضعت عليه البصل وجعلته قليلاً حتى ينحمس ( يكشن )

ثم بعد ذلك وضعت السمان عليه لكي ينحمس أيضا مع البصل وأضفت عليه قليلا من البهارات . وتركته قليلاً ..

ثم أضفت عليه الطماطم والصلصه والملح وأغلقت الكاتم بإحكام ..

بعد عشرة دقائق فقط .. أطفأت عنه النار وقمت بفتحه .. الحمدلله كان مستوى جداُ

وها أنا أتذوقه لأتأكد من إستواءه ..

والآن نقوم بصف السمان على شبك الشواء ..

بعد أن قمنا بوضع جميع السمان على شبك الشواء نقوم بوضع الأرز في القدر بعد التأكد من ملوحة المرقه  ..

بعد إضافة الأرز نقوم بوضع جميع الفلفل ( الحبحر ) الموجود لدينا كذلك نضع الليمون ثم نغلق القدر بإحكام  .. إذا بدئت صفارة القدر بالتبخير نقوم بتقصير النار من تحته وننتظر من 13 الى 15 دقيقه ثم نطفىء عنه النار..

نلقى نظره على الشواء لحين أن يكون الأرز جاهزاً ..

الآن وبعد أن جهز العشاء .. تفضلوا اهلاً ومرحباً بكم وبالهناء والعافية ..

عاد لازم تآخذون لكم بيالة شاهي بعد هالعشاء ، شاهي جمر يعدل الراس ..

أتمنى أن يتكون هذا الطبق البري راق لكم ونال استحسانكم  .. والمعذره إن كان هناك خطأ أو نسيت شي لأني كتب هذه التدوينه على عجالة ودون سابق خبرة في تدوينات الطبخ .. ربما يلزمني أن ألف وادور على مواقع الطبخ ومدونات الطبخ :)

القادم إن شاء الله >> قرص الجمر مع السمن والعسل

About these ads

الإجراءات

Information

49 responses

15 10 2008
متواضع

مشاء الله … تسلم الإيدي
شكله بالدماغ

تمنيت أني معكم

والله يوفقكم

15 10 2008
عبدالرحمن

أنعم الله عليك

هذا الطبخ ولا بلا

ننتظر القادم من تدويناتك الرااائعه جداً

16 10 2008
صوت الحياة

//

ماشاء الله تبارك الله ..

سبحان الله غير ” الدجاج” ..
ما اقدر استسيغ طعم شي ثاني ..

بالعافية ..
وتسلم الأيادي ..

//

16 10 2008
fouz

طريقة عمل موفقة…
ونهاية شهية…
بالعافية.. :)

16 10 2008
TO0OP

الله يهنيكم

بس عاد ليش سمان؟
:)

16 10 2008
سوسو

عليك افكار حلوه يامساعد
والاكله شهيه ميه بالميه
شكلك طباخ ماهر هذا وانت في بداية الطبخ
اتمنى اني اذوق مثل هذي الطبقه الحلوه

شكلها هممممممممم
بانتظار الطبخه الجايه
ولا تتأخر علينا

16 10 2008
بنت الروح

يعطيك الف عافية
ماشاءالله طبخك حلو ومرتب

الله يقويك ويسلم اياديك
وبانتظار الوصفة الجاية

16 10 2008
الباحثة

أكرمك الله يامساعد
أولاً تصوير…….. في قمة الروعة

تصميم البنر…. رايق وجميل

الطبخة………. تسلم يديك مقادير موزونه ودقيقة والطريقة مدعومه بالصور وواضحة،، صراحة بداية موفقة، ولا تحتاج تزور مدونات ولا مواقع طبخ، بل مدونك تستحق من يزورها من الطباخين :)

والله شهينا،،،
ننتظر القرص بفارغ الصبر

16 10 2008
مفنوده

شاللـي خلاني ادخل مدونتك وانا صايمهـ >.<

مساء الخير اخوي مساعد ،، بصراحة وجبة شهيّة جدددددددددا بالعافيه على قلوبكمـ ،،

16 10 2008
مجرد أماني

مانعرف السمان بس شكل الكبسة مشهي…
ملاحظتين :
1- هي كبسة بالفلفل وإلا فلفل بالكبسة !!؟ :D
2- إش الرواق-ماشاء الله علكيم- تزينون طبختكم بالزبيب والمكسرات وإنتم بالبر!! طبخة ملوك ههههههههههه
بس والله تعلمت شيء… لمن يصفر الكاتم نبدأ نحسب… كنت أحسب لمن يصفر يعني الأكلة خلصت :D هذي أهم فائدة استفدتها دامني ماراح أطبخ بالبر
إلا صدق قبل أنسى : دام السمان مستوي من قبل ليه تشويه ! زيادة غلبة :|

شغل تمام، المرة القادمة نبغى تشيز كيك بالبر :D

16 10 2008
ذات الشمم ..

ما شا الله ..
شغل مرتب و كامل ..

لو كان لحم بدال السمان !
<- وحده لا يمكن تاكل أي شي فيه نوع من أنواع الطيور ..

اكثر شي جذبني الفلفل !

.

بالعافية عليكم ..

16 10 2008
مساعد

متواضع .. الله يسلمك يالغالي .. والله يحييك المره الجاية :)
..

عبدالرحمن .. صحه وعافية يالدحمي وانت حكم المفروض تعطينا وجهة نظرك لأنك ذايقها .
وأبشر بالجاي ان شاء الله
..

صوت الحياة
الله يعافيك ويسلمك أختي .. غريبة نسبة كبيرة من الفتيات ما يحبن أي شي غير الدجاج ، مع أنه في لحوم ثانيه أحسن وأفود منه .
..

فواز .. الله يعافيك أخي وشاكر لك ثنائك ..

16 10 2008
مساعد

توب .. لأن السمان لذيذ وفيه نوع من التغيير عن الروتين اليومي ( دجاج دجاج دجاج )
..

سوسو .. الله يسلمك ويعافيك ويحييك :) وعساه صحه وعافية ..
ومن المفرح انه راق لك واعجبك :) وأبشري بالجاي إن شاء الله
..

بنت الروح .. الله يعافيك ويسلمك .. والجاي أفضل ان شاء الله
..

الباحثه .. حياك الله وصحه وعافية وشاكر لك ثنائك على التصوير والتصميم .. صراحه رفعتي معنوياتي :) شكلي أبقلبها مدونة طبخ ههه
..

مفنوده .. أعظم للأجر :) .. والله يعافيك ويبارك فيك .. شاكر مرورك
..

مجرد أماني .. السمان طير صغير وبعضها يكون قريب للدجاج وطعمها مميز ولذيذ وخاصة اللي يكون بري بعكس سماننا لأنه أنتاج مزارع .
لا تتدققين على الملاحظات :) حنا رايقين مره ونحب الوناسه والفلفل شي أساسي مع الكبسة :)
اما ليش نشوي السمان وحنا طابخينه لأن شوي السمان يعطيه نكهه طيبه ورؤية مشهيه .
وأبشري المره الجايه نسوي دونات وتشيز كيك وكنافه :)
..

ذات الشمم .. ياهلا اختي .. غريب امركن واحد لا تأكل أي شي غير الدجاج وانتي لا تأكلين اي طير معنى ذلك ان جميع اكلك من اللحوم :) أنصحك بتجربة السمان لن تندم أبداً..
الله يعافيك

16 10 2008
إحساسـ

ماشاء الله تباركـ الرحمـن ..

انعم الله عليكـ مساعد ..
شوقتني للبر .. وشهويتن ع السمان
دخلنا الوسم والامطار قريبه بإذن الله
وابطبخ طبختكـ المزيونه يازين .. إن شاء الله

باركـ الله فيكـ ..
وبإنتظار الطبخات المقبله ..

17 10 2008
خالد

(اسامه و خالد ضمن قائمة الاحدعشر المذكورة اعلاه )

الطبخه ممتازة جدا ورائعه ولاتقاوم اممممممممممممممم
بفضل مشاركة الشباب يعني حنا هههههههههههههههههه
وشبة النار والقهوة تمامممممممممممممممممممممممم
وبنتظار القرص عندنا

17 10 2008
الشيخ مقبل

انعم الله عليك ابو مازن هذا طبعك وحنا من ربعك
وعقبال المنسف الاردني تطبخه للزلامات ولا تنساني
ترى في بالي أذوقه
يعني لا تقول مافيه احد يشارك و يطلب و يأكل

17 10 2008
~:: الأرجــــوان ::~

ماشاءاللهـ الطبخهـ باين إنها لذيذهـ ^_^

17 10 2008
oum3ali

ما شاء الله لا قوة إلا بالله … الطبخات البرية تفتح النفس
الطبخة باينة لذيذة و خاصة في مثل هذه الأجواء
يعني االواحد ياكل فوق الشبع
سأجربها ان شاء الله بس ينفع بالدجاج لأني ما أحب السمان للأسف :(
الله يعطيك العافية أخي و سلمت يداك … منتظرين جديدك
دمت في حفظ الرحمن …

17 10 2008
عابر سبيل

يااااااه والله وناسه :)

دخيلك خبرني وبكل صراحة ووضوح
كم ضحية من السمان تقع في بطنك في الوجبة الواحدة :) ؟ ؟ ؟ ؟

17 10 2008
DeedEe

:| !
سمّان !! مايعوركم قلوبكم وانتوو تاكلونها :( ؟
مره صغار ويكسرون الخاطر :(
مره مااحب اكل اي حيوان , يعورني قلبي وزياده على كذا اقرف لما اتذكر شكله على الطبيعه :| !

بس عموماً تسلم يديك , وبداية كويسه :p
شغلك كله مرتب ماشاء الله , والله يطلع منكم <– بتتكفخ

17 10 2008
مساعد

إحساس ( عيسى الخالدي )
صحه وعافية والله يحييك دايم
وتكشت وتنبسط ان شاء الله وتشوف الربيع باذن الله
والله يحييك ويبارك فيك ولا تقطعنا من شوفتك :)

..

خالد .. أكيد انتم الأصل وحنا تبع لكم :) أنتم زينة الكشته
وان شاء الله أضبط لك اللي تبي إذا جيتكم :)

..

الشيخ مقبل .. ياهلا ياهلا .. جيالله شيخ القبيلة :)
وأبشر باللي تبغاه يا زلمي بس انت جب طريقتها ومقاديرها وأبشر باللي يسرك

..

الأرجوان .. :) بالعافية

..

أم علي .. صحيح طبخات البر له طعم ثاني وشكل ثاني وتزيد شهية الواحد بالبر مع برودة الجو وسعادة النفوس وبرفقة الشباب القروم .
يصلح دجاج لكن ما استفدي بتكونين صلحتي كبسة دجاج .. يعني ما سوينا شي نفس الروتين اليومي ..

..
عابر سبيل .. الله حيه .. بتزيد الوناسه إذا شاركتنا وناستنا :)
وش قالولك داوود ضحايا :)
تقريباً من 4 – 5 سمانات لانهن صغيرات جدً

17 10 2008
النهيم

لا حول ولاقوة الا بالله
أشوف الصور وأنا . . . . شبعان يالله

بطني يرسل للمخ أني مليان
والمخ يرد: . . . ياخي ابو الشباب مدري وش شايف شهية الاكل مرتفعة
رد البطن : صدقني شكله شايف كبسة السمان المشوي
المخ : أجل صرف اللي معك . . . . طوط طوط طوط

يعطيك العافية

دمت بود

18 10 2008
oum3ali

طيب ماشي اخي مساعد…
نحاول نكسر الروتين و نجربها بالسمان (اصلي ما حاولت اذوق السمان من قبل)
شكرا للنصيحة أخي …

18 10 2008
عبدالعزيز

انا من اصحاب الكهف .. قصدي من 11 نفرات اللي اكلوا سمان ابومازن

شهادتي مجروحه في ابو مازن بالطبخ صراحة صحيح هو في النظافة لك عليه شوي لكن عليه نفس في الطبخ خخخخخخخ :)

ترى انا اللي مصلح الشاهي ! :|

شكرا مساعد

18 10 2008
ام هاني

الوعد قدام نبغى منك طلعة وطبخه ولا تنسى ابو نسب هاليومين

18 10 2008
haya1

مع اني ما احب الرز إلا ان الطبخه شكلها حلوه
بس ورا البريق اللي في آخر صور اسود مررره حكوه ولاشوفوا له صرفه << نقاده !
موفق

18 10 2008
جنّة

ماشاء الله ,
شكلك طباخ :) ..
وعلى أني ما أحب البر بس أحس هالأيام الجو بالبر مره حلو ..

أنتظر القرص :d

18 10 2008
مساعد

DeedEe :) حلوه تعورنا قلوبنا ..
هذي يا أختي نعمه من نعم الله علينا والحمدلله والشكر .. ومن ضمن الماكولات اللذيذه :)
وصغرها لأن حجمها هكذا ..
ردك أثار فضولي فكيف تأكلين الدجاج وانت تعرفين شكله إذاً .. أم انتي نباتيه ؟ :)
سلمك الله أختي ..

..

النهيم
ههههههههههههه حلوه حوار داخلي ..
لكن على كذا جعت مره ثانيه بسبتي :)
الله يعافيك أخي وشاكر لك

..

ام علي .. في المثل إكرام النفس هواها .. فلا تقسري نفسك بالإجبار ولكن جربي وأن لم تستسيغيه فلا تأكليه ..
حياك اختي ..

..

عبدالعزيز .. هلا هلا .. وش قصدك يابو :44: ، شكلي أبتوطى ببطنك :)
صلحت الشاهي ونشبت بحلوقنا :)

..

أم هاني .. تآمرين أمر يالغالية بس كم عندنا منك :)
والغالي عندك يغلى عندنا :)

..

هيا .. الله يحييك أختي الطبخ بالبر يتغير :)
وأبريقنا مسود لأن طلعاتنا للبر كانت كثيره ومتتالية ومافيه وقت لتنظيفه
فهمتي يالنقاده :)

..

جنه .. شوفت عينك .. أنتم الحكام
هالايام هو من أزين أوقات الطلعات الليلية البرية جو معتدل مائل للبروده ونسائم لطيفه ..
شكراً لإنتظارك

19 10 2008
Hanan

ما شاااء الله
بالهناا والشفاا

شكله لذيذ :)
تسلم يمينك

19 10 2008
fouz

انا فووووووز ولست فوااااااز….من جد السمان م أ ث ر …

19 10 2008
نادر

انا من مدمني السمان المشوي ..

و شكل هالطبخة بتدخل في القائمة .. :)

19 10 2008
محمد الجرايحي

بارك الله فيك أخى مساعد
وأهم شئ البساطة فى الشرح
والصور واضحة وتكاد نشتم رائحتها ههههههه

19 10 2008
نجلاء

مآشآء الله تبآرك الله..
بآلهنآ و آلعآفية..

مآشآء الله عليكم مسوين ديكور مكسرآت بآلبر..

بآنتظآر آلطبخآت و “بحمآس” :)

20 10 2008
reema0

ما شاء الله عليك طباخ فنان ومبدع انا الي ما احب الرز اشتهيته من الصور ههههه :)

20 10 2008
مدونة الكاشف

جيت من الدوام …قلت أمر اسلّم على الحبايب
المشلكلة إني كنت صائم !!!!
الله يسامح ياخوي … ما خلّصت من الموضوع إلاّ وعيني على المطبخ..
المرة الثانيه راح أقرا من مدونتك بالليل ..
بصراحه شغل محترف ..
الله يعطيك العافية

20 10 2008
مساعد

حنان .. يالله سمي :) الله يعافيك ويسلمك .

..

فوز .. آه آسف جداً فوز كذا صح فوز :) لا تشره على أخي .

..

نادر .. الله حيه .. أجل وافق شن طبقه :) بالعوافي مقدماً

..

محمد الجرايحي ..أستاذي الفاضل الله يعافيك وأشكرك على ثنائك العاطر لي ولطبختي :)

..

نجلاء .. شفتي اشلون اختي ماباقي إلا نصلح تبوله بالبر :)

..

ريما .. بشويش لا تآكلين الشاشه :) شكراً لمرورك وتعقيبك

..

الكاشف .. الله يحييك د عبدالله آسفين ياأخي هههه شفت أشلون التأثير النفسي للصور على الصايم :) .. على كذا صارت مدونتي بالشفت المسائي :)
شكراً عزيزي على ثنائك العاطر

21 10 2008
الـمـتـوهـج

اغراااء يامساعد

صور رائعه وطبخ نضيف =)

بالعافية عليكم

شكراً لك

23 10 2008
أفنان

ماشاء الله

بالعافيه على قلوبكم

26 10 2008
مساعد

المتوهج .. الله يعافيك ويخليك اخي .. هذا من ذوقك

أفنان .. الله يعافيك أختي

26 10 2008
M@nnoU

حياك الله أخي مساعد

شكلها لذييييييييييييييذ
بس انا ما ذقت السمان و لا مرّه

و فّقك الله ….

26 10 2008
شخص

سلمت يمينك يا مساعد ..

شهيتنا لطلعات البر على قدوم الاجواء الربيعية .بالهناء والعافية

28 10 2008
روشانا

يا هلا مساعد

وش ذا الزين ما شاء الله

غلبت علينا بصراحه

شكلها لذيذ ولو اني مستحيل آكل السمان

ولا القماري ولا الحمام ولا اي نوع من انواع الطيور الصغنونه >> ارحمها

يعطيك العافية على الشرح يفتح النفس

ولا اجدع شيف عالمي

1 12 2008
ابراهيم البهدل

وش الطبخات ياولد

مع إني لا أحب السمان بس على شانك خلاص

مو معقوله ماتوقعت تطبخ الطبخ الزين ماشاء الله عليك الله يحفظك من العين

7 12 2008
غيـــر

وااو .. ما شاء الله .. حماس و طباخ و شوي .. أحرجتنا الصراحة :d و بتخلينا نراجع نفسنا و نتعوذ من ابليس و ندش المطبخ لوووول

بالعافية عليكم الفرّي :)

7 11 2009
نور

الله يعطيك العافية وتسلم يدك
عزيزي ارجو ان تشرح طريقة القهوه العربية
اسويها لكن ماتعجب العيله على الرغم انا مااشربها
ولك جزيل الشكر

21 11 2009
ام عبدالله

مرحبا ممكن اشويه بالفرن لان ماعندي فحم وودي افاجىء زوجي بشي جديد لان يحب التغيير

21 11 2009
ام عبدالله بأذن الله

مرحبا ممكن اشويه بالفرن لان ماعندي فحم وودي افاجىء زوجي بشي جديد لان يحب التغيير واحب اسعده

29 12 2010
meoome

شيييييي ماشاء الله

عاد والله انا شريت سمان وحبيت اليوم اسويه لاهلي وجلست احوس بقوقل ادور على وصفه حلوه له
ولقيتها هنا :)
احلا وصفه شفتها للسمان مشهييييييه طبختك
تسلم يدك من كل شر

18 05 2012
99999999990

تسلم يدك من كل شربصراحه شغل محترف

\

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل خروج   / تغيير )

Twitter picture

You are commenting using your Twitter account. تسجيل خروج   / تغيير )

Facebook photo

You are commenting using your Facebook account. تسجيل خروج   / تغيير )

Google+ photo

You are commenting using your Google+ account. تسجيل خروج   / تغيير )

Connecting to %s




تابع

Get every new post delivered to your Inbox.

%d bloggers like this: