من الذاكره .. عندما كنت متعفطُ تحت الدركسون

17 11 2007

في ذاك اليوم قبيل 9 سنوات تقريباً كان الأهل مسافرين خارج الرياض فقد كنت لحالي بالبيت ( عزوبي) في ذاك الوقت كانت سيارتي ددسن غماره ( كني بدوي ) وكنت مولع ..


بطلعات البر والكشتات حتى الثماله ، حتى أني ما تهمني المسافة اللي أقطعها للوصول إلى مكان الكشتة .. تعرفون الرياض أقرب مكان يصلح للكشتة يبيلك تقطع مسافة 65كيلو .. المهم في ذاك اليوم قلت خلني أدق على حدى هالشباب وأطلع معه نتعشى بالبر وأغير جوا من غثا الشغل الصيفي ومن غثا الرياض وزحماته .. كنت فكرت من قبل مع من أطلع ووقع الاختيار على شخص من أعز الأصدقاء .. دقيت عليه ومن حظي انه كان يمر بنفس الظروف الصعبة اللي أمرفيها ( العزوبية ) .. لا وقال إن عنده واحد من أخوياه من بريده وجايه زيارة وانه بيطلع معنا ، فقلت تمام كلما كثر افراد العصابه زانت الطلعه .. خويي هذا سيارته هايلكس لكن كحيانه ومهتريه ( شكلي أبنجلد إن كانه قرى هالشخاميط ) .. الزبده : إننا أتفقنا على الموعد والعفش .. وبالفعل ألتقينا عند مدخل النفود .. وبعد السلام وهه وهه وين نجلس ، وين تبون ، أسبقنا أنت ، لا أنتم .. عاد أنا زي ما قلت لكم من قبل ماخذ بنفسي وبسيارتي مقلب ، فعلى طول دخلت النفود قبله وهو صار يمشي وراي .. قطعنا مسافه وحنا على هالحاله إلين وصلنا لذاك الطعس ( طعس : تطلق على الشيء المرتفع من النفود وتطلق أيضاً على البدوي ) ، وقفت أنتظر خويي إلين وصل قلت له أطلعه قبلي فرفض وأنا ماصدقت خبر .. سبقته ومشيت بأقصى سرعه خوف من أني أغرز ثم أتفشل منه هو وخويه .. وأنا في لحظات الصعود طاير ومتحمس ومنسجم مع حنة المكينة كأنه بدى للطعس طرف حاد وأثر هذا اللي أنا قاعد أرقاه سيف ( السيف : يطلق على الأداة الحاده ، ويطلق على المكان المرتفع من النفود إذا كان ذو قمة حادة ممتده ) .. عاد وش رايكم جاي مقلع على وجهي وراقي سيف ، وش بيصير أكيد النتيجه أبنط ( أبقفز ، أبنط ) وهذا اللي صار نقزت حوالي 3 أمتار .. ما دريت بنفسي إلا وانا متعفط تحت الدركسون ، والغبار يملئ الكون ، وربعي يدورون ، أين سائق الدادسون ( هههـ قلبتها سجع ) على بال ما اخذت أنفاسي وتنفسة الصعداء ، وشفطت من الهواء حتى امتلت رئتاي من الكربون الخارج من السياره نتيجة النطه.. نزلت من السيارة وما أخذت شوي إلا والشباب جايين مسرعين زيي لكن تداركوا الموقف ووقفوا بنص السيف ولا كان طبوا بحوض الددسن .. وجهي صار طماطه من الفشيلة والإحراج .. نزلوا الربع وهم فاطسين من الضحك علي وأبو الشباب خويي الله يجزاه خير مسكها تطنز علي بغيت أبطل من الطلعة ، على العموم حنا كمل طلعتنا عقب ما طلعنا مواترنا وزبطنا العشاء وسمرنا سمره حلوه ثم رجعوا ورجعت أشعث أغبر ..

سردت لكم هذا الموقف من الذاكرة دون أي تبهير ، وصورته لكم كما أنكم معنا ..

Advertisements

إجراءات

Information

14 تعليق

18 11 2007
abod1

هههههههههه

الحمد لله على السلامة

( متعفط متعوب عليه)

الف شكر عزيزي وننظرك في تدوينة آخرى..

🙂

18 11 2007
musaad

الله يسلمك

( متعفط ) زي قوطي البيبسي

وشاكر لمرروك الكريم

18 11 2007
shiney

ههههه يعطيك العافيه
بس وناسه هالمواقف مع انها محرجه بوقتها لكن ممتعه اذا جاء الواحد يتذكرها

18 11 2007
musaad

أسعدني مرورك أخي shiney

وصحيح كلامك مواقف محرجه بوقتها وممتعه عند التذكر

21 11 2007
ابورحيل

تستاهل مسوي نفسك عنتر

21 11 2007
musaad

ههههههههههههههههههههههه
وراك علينا ابو رحيل

22 11 2007
ابورحيل

علشانك طالع وما قلت لي

22 11 2007
mok

طول السنوات وانا اعلمك السواقه و اخرته تفشلنا

23 11 2007
musaad

ههههه لا هذا قبل لا تعلمني السواقه

شاكر مرورك

23 11 2007
alaqare

عساك ماحاولت تكررها

6 12 2007
shetwi

هههه في حلوه … الحين عرفنا سالفة المخوش اللي ترتسم على محياك (:
وعلى حد علمي الموقف كثير وفيه اكثر … المستودع اللي خلص … زنسيان اللحم بعد الوصول للموقع … ونسيان الجوال
فوق تندة نفس الددسن … ههههه

6 12 2007
musaad

هههههههههههههه شرفتني shetwi

لا تفضح يابن الحلال هههه كبيت عشانا

5 01 2008
خالد

ههههههههههههههههه

لاتتحمس المره الثانيه وانت تطعس ……

10 01 2008
musaad

هلا ومرحبا خالد
بس تعرف التطعيس يبيله حماس عشان تحس بالإثاره هههه مهيب المشكلة من التحمس المشكلة الجهل بعلوم البر

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s




%d مدونون معجبون بهذه: